ماتزعلش ... ده وده ( زي حالاتك)

السلام عليكم ورحمه الله

لما يبقي عندك امتحان والامتحان جه سقع
وانت مش عارف تحل حاجه خالص
وطالع من الامتحان مخنوق زهقان مانتاش طايق نفسك

طب لما تطلع وتتكلم مع صحابك وتلاقي الكل (متلطشله) زي حالاتك

طبعا حالتك بتبقي احسن وبتهدى الخنقه شويه

طب ليـــــــــــــــــه
؟؟؟؟؟؟؟؟

لان الامتحان ماجاش صعب عليا لوحدي
صعب علي الكل
عليا وعلي غيري

وهي دي طبيعتنا
ان البني ادم بيقل احساسه بالهم لو حس انه مش لوحده فيه

زي ما الخنساء قالت في موت اخوها

ولولا كثره الباكين حولي ...علي اخوانهم لقتلت نفسي
وما يبكين مثل اخي ولكن ... اسلي النفس عنه بالتأسي

حد يسألني بقى ,
كل الكلام اللي انت قولته فوق ده علاقته ايه بالموضوع ؟؟

هقوله للاسف اي حد لما بتقابله مشكله
بيتهيأله انه لوحده فيها
ومفيش حد حاسس بيه
مفيش حد يستحمل اللي هو فيه

لكن الحقيقة
انك
"مش لوحدك !!

اي ان كان الظرف اللي انت فيه دلوقتي

غريب محرج مؤلم

في ناس كتير عندها نفس مشاكلك وظروفك

اقولك علي سر بيني وبينك
لما عقلك يقولك انك لوحدك في الهم ده
اعرف انه بيضحك عليك عشان تفضل تنكد علي نفسك

يعني لما تقعد تعيط لوحدك وتقول
ليه بيتنا بس اللي فيه مشاكل؟؟
ليه انا بس اللي ما بيتقدمليش عرسان؟؟
ليه انا بس اللي مرضي مابيفارقنيش؟؟

انا بس انا بس
لوحدي لوحدي لوحدي

ياعم انت مش لوحدك

الحج سيد جاركم اللي فوقيكم ممكن يكون عنده مشكلتك وانت مش عارف
البت فوزيه اللي عامله فرحانه ممكن تكون عندها مشكلتك وانتي مش عارفه
هشام اللي معاك في الشغل ممكن يكون عنده نفس مشكلتك وانت مش عارف

اللي لازم تعرفه
انك مش لوحدك اللي عندك مشاكل
او اللي عندك المشكله دي

غيرك كتير عندهم نفس المشكله وانت ماتعرفش
لانهم مستحملين
هما مش احسن منك وتقدر تستحمل انت كمان
واحمد ربنا انه مابتلاك بمصيبه اشد

تسلم ايدك بجد توبيك جميل اوى او ى

وفعلا الناس بيبقى فيها اللى فيها ومحدش عارف

وكل واحد فينا فاكر انى مصيبتة اكبر

بجد مش عار اشكرك ازاى الكلام اللى اتقال هنا

تسلم ايدك مليون مرة